الخميس، 1 أبريل 2010

قاعد امطرف

شعراكرم الكاسح


قاعد مطرف والعيون تذرف نبي نخرف مالقيتش جار

على ايام عدّن كِيفن مايردن ولاعد يجدن غير بلكدار

عدى وقعدنا صوب ماجددنا طايح سعدنا من كدر واقهار

اطرطش غلانا غصب يامشكانا وشمتو اعدانا صغارهم وكبار

اللي قبل كنا ذايبين محنه كنا فجنه اليوم تمت نار

حكايه بقينا داكنه وحزينه عليها بكينا في خفا وجهار

قلة اموالي خيبت ف آمالي مشغول حالي في مسا ونهار

خدمه صعيبه والردود عطيبه واليوم عيبه كان ديك اصفار

يروقن احوالك كانك باموالك معا اللي فبالك ما تذوق امرار

هاذي القسمه هكذي منقسمه ناساً ابّسمه وناس بلحسار

وانا ابسامي موتن قدامي معاهن احلامي رايحات دمار

ليومة الشيله مالقيتش حيله العين الضليله مالها دبار

عدى زماني بدلوه مكاني خبار جاني حط لي ماصار

كذاب قتله شاط في رقتله ماهيش ختله قال شوف الدار

راهو معدي بايعك ياودي من جد جدي نقولك ماصار

عديت نجري جمرته في صدري ايام عمري عاودن تكرار

ايام كانن زاهيات يبانن عليهن تقانن ياسّم واقدار

مايخيب ظني في عزيز انظني ناش درت كني فيه هالمكار

ناشد عليهم جارهم طرحيهم اريافي عليهم دار في نهار

فعيني نحايل نشدها تسايل سمح المسايل من ايديا طار

قال لي انساهم ضرني بنباهم ونا اللي غلاهم دار في مدار

روحت سارح ضايقه المطارح بكايا امبارح ضرهن لنظار

دار في عيبه واعره وصعيبه الخاطر طبيبه قال ياستار

قال لي انساهم ماتقص وراهم وغير غلاهم لو لزم مشوار

خذها نصيحه من امجرب طيحه هكي صريحه لزهم بغيار

لاتقول لالا وتلتهي بمواله تباعد مناله يتوه الدوار

زيارة اطلاله حلم مات قباله لاتفيد حاله ولاتطفي نار

قسمك اتطوله كان راد المولى راهن حلوله واجدات اختار.



ليست هناك تعليقات: