حبل الغلا

ردي علي الشاعر اكرم موسى الشلماني

((لادرت غيرك لاغلاك نسيته.. حبل الغلا عمداً اليوم رخيته))

راخيه نا بلعانه حليت

عقدته افتكيت من جرنانه

انسيه خاطري وهوفيه ياما عانا

 شعفه وتوبه عَ الغلا وقسميته
اليوم ناسي دمعته واحزانه

 وناسي امراره وقسوته وحنيته

بيت الغلا لو مشرعه بيبانه

 نبعد عليه اتقول ما حقيته

انجري خطاي نفوتهن سيسانه

 نواطي النظر نستخسر التبهيته

وحتى ان قابلني بضم احضانه

اليوم خاطري راني عليه نهيته

ياما الغلا حاربت في ميدانه

وياما حصل عقلي فْشرك غيريته

وياما صهدني حر من نيرانه

 وياما سنيناً م الشباب عطيته

ونقول ماغير الزها اْعقبانه

عذاب وجفا وبكا هو ثاريته

******

رخيته كله

 اليوم ع الخطا طالب سموح من الله

راقن احوالي صحتي ماشاالله

 الماضي دفنته بالثرى واريته
غمام الغلا عني اليوم اجّلى

 بعد صبر نا راني زهاي جنيته

نوصي الفاضي ما بغلا يسلى

راه يصهدك كان بحفاك وطيته

وراهو ان شب معاك زاد تعلى

وتقب دمعاتك وما طفيته

انهاه قلبك ع الغلا لاتدله

 يطيعك وهو فاضي ان كان نهيته

ويعصيك كنك بالغلا تدلل له

 يجيك بندم لو ع الغلا داعيته

نعطيك ناتج نا اللي واصل له

صاحب الغلا كيمن فقد حريته

ابعد عليه جملة حواسك خله

لاتكون لاسيده ولاحاشيته.