محاوره بين الشاعر والحوش

يقول الحوش للشاعر :

شن جاي تبي من بعد ماهانك ..وبالسو قابل طيبتك واحسانك

شن جاي تبي يادعي من غادي

مصبي احذاي وبالحنين اتنادي

حتى وانت ساكت حس جوفك صادي

خبر علي جرحك وميل زمانك

رد عليه الشاعر وقال:

ناجاي بيش انحقه

ارياف الغلا عطبك علينا نقه

مليت هو يضرب ونا نتقى

نين جابني رامي علي بيبانك

الحوش:

انظر كيف مانك صافي

مسيب سريرك والفراش الدافي

تحت المطر تبكي نريد اولافي

حديثك عجب رايفت للي خانك

الشاعر:

ياحوش قيسك جاهل

الشوق في غلا لولاف ماهو ساهل

نحكي معاك ونا اللي نستاهل

شن عرفك مايفهمن سيسانك

الحوش:

ماني فهيم صحيح

لكن ابنايا ماتهزه ريح

ولاني علي طول الزمان انطيح

كي طيحتك يلي طويل لسانك

الشاعر:

عيبك زاد

ياحوشها مانريد لك ميعاد

ولانريد جيه امغير ربي راد

ولقيتني مصبي علي بنيانك

الحوش:

ياريت تمشي اتروّح

في شوكتي لاماتجي تطوّح

خلاك شوق اعزاز غير اتنوّح

تبكي تريد الحن من حبانك

الشاعر:

نبكي نريد الحن من حباني

ونبكي نريد يروف بي زماني

ونبكي نريد اتروف ماتنهاني

نريد ننظره غالي اغبي فاركانك

الحوش:

لاماغبي فاركاني

ولاهو فهالشارع ولاالسلماني

غرب سكن عنوان موعنواني

لايريد شوقك لايريد حنانك

الشاعر:

هاذين موش اخباره

تكذب علي اتريدني انتواره

تعرف اجحا نا راه كي مسماره

لاعند ماتصدق معاي بيانك

الحوش:

بياني حق

عدى خلاص مناك ماينطق

حديثك يخلي كل عزم ايرق

الله يعاونك ياريت في حرمانك