شعر اكرم الكاسح
رقادة ريح وبها عيروني
عيت فلان لطوه النصيب
عابو في منو ابما عطوني
ونا لي طبع مانحمل العيب
ابما كافيت لازم تعذروني
لاوالله نا ماني غضيب
علي هالحال كنكم تنظروني
تقولو في ماينفع طبيب
ميت راه لكن مادفنوني
عل لموات ماينفع نديب
كل اللوم عللي خافوني
خلافن شين خاتمته العيب
افعيت فلان ياخيبة ظنوني
امري لله ماكيفه حسيب
جيت القدر نبي صغروني
قل المال خلاني عطيب
شينك وقت كبن ياعيوني
وشينك بخت باعد لي قريب
وشينك ياس جا بينه وبيني
وشينك حال ظالمني حبيب
وحق الله وراس اللي ظنوني
جايب كل مانقدر نجيب
نا بالود نعطيهم عيوني
اونا بالسيف ماكيفي صعيب
عابو في نين ناضن جنوني
مالك قدر ياخالي الجيب
شروط نسيب كاره حملوني
وقالو (لا) جيبلنا وجيب
لاماقدرت قلت الهم رموني
بطلق لسان فالخاطر يصيب
يلي قبل كنتو تقدروني
ليش اليوم عاقلكم يعيب
بعد تشكير واجد تقرضوني
ومن كل عيب حطيتو نصيب
تريدو فرح كان الله افعوني
يقولو الناس ننقنا عجيب
راقد ريح وانتو تعرفوني
ارضيتو بي في لول نسيب
اليوم عليش تبو تهلكوني
تقول ناويين فضة هالسريب
هي فضيت هالخلطه خطوني
بلكي هك خاطركم ايطيب
انعاني جرح سطاره كنوني
امعا عبرات تابعهن سكيب
ادري بالحال كل اقصي ودوني
وبان الهم في طغوة الشيب
ونا المظلوم سبقوني شكوني
سبحان الله فالطبع الغريب
ذنب البنت يبو ايحملوني
وهم اسباب لطة هالنصيب
عرب بالمال صخ صخ بدلوني
ومالي ذنب ياعالم الغيب
هانو وين ماهم هونوني
كتاب الصوب كملته شطيب
امجافي الدار لي هلها جفوني
لاعدشوق فيها لاصحيب
ليست هناك تعليقات:
إرسال تعليق