مشاركتي في قصيدة سلف مردود راس البيت للشاعر المرحوم حسن لقطع
((سلف كيف الصاغ المنقود.. سلف مردود ..سلف فيه اْقصاد ومقصود))
سلف جاني من سيدي حسين
كلام وع الباطل مسنود
خطر قولك يالقطع وين
عرب عابو قدام شْهود
كلامك حفظنا لسنين
لبوفلاقه يوم شْدود
قعد في لسان الناس خزين
وْصلني وانتا تحت لحود
عرب داروني ناهوالشين
انريد نكافيهم بردود
لساني كيفك طايب زين
وماهم لي ف الرد نْدود
حْقوقي ماتنساش العين
تراجي في القبلي الخمود
عرب منه الدين بعيدين
اسلام وفيهم طبع يْهود
غْلطنا جيناهم خاطبين
نريدو حبه من عنقود
اْو وين صارخصامه بعدين
قدعت وقلت الخير نْعود
عنبكم باسل ياسي حسين
نْريدوا خير من الميجود
غلاكم هنته في يومين
خويل ومانطاطي للقود
تْشد علي م المال الفين
ومرسالي ترده مكيود
ولاتعد عْتاب محبين
ولانك للوام عدود
خذيت ف بنتك حلوانين
وشي ف لضحى والميلود
تقول هذا حقي مش دين
انا ماني زاهد مزهود
فْجيبك يابو القرقاضين
عقارب وحناشه وصيود
لقولك لو نبي تبيين
اساع الحق عليك يسود
ونكشف قدام السامعين
السر اللي ماهو مجبود
اسكت خلك جنب الحوشين
اجعنك طرحيهن ممدود
مسبل فيد الغسالين
طعام يراجي فيك الدود
تشيل معاك غراب البين
الله ايهد الظلم هْدود
يردالحق لها ليدين.. بلامجهود.. ادعا بس بجاه المحمود.
ليست هناك تعليقات:
إرسال تعليق