فراق الغالي

شعراكرم الكاسح الدرسي

سبحان ياموعر فراق الغالي
وسبحان كيف جاني الصبر بلاه
يومين يالله الكريم العالي
وتقول مية عام في فرقاه
فيهن اشواق معطبات احوالي
لغالي زها لغيون يوم لقاه
نرقد ونرجي صبح يومي التالي
مانريد نصبّح الا بملقاه
لوكان مايقسم الموت اولالي
اللي لخاطري هوه دواه وداه
بلارفقته كيف ايتهنى بالي
اللي ماانطيق انعيش غير احذاه
رافع ايديا يالله بسوالي
تجاوب ادعايا فالغلا ودعاه
تجيبه ويبقى بلقسام حلالي
نصونه غلاه العمر مانجفاه
هلي بجماله فات حد خيالي
لونوصفه يقصر الوصف امعاه
نحلف بربي وكل ماهو غالي
غلايا اكفاه يفوت حد غلاه
اللي امعاه فالغيه القيت دلالي
واللي القمر مايبان من يالاه
جريت وطلبته جاوبوه سوالي
ناسن يعدو من طلب مصباه
وحتى ونا خصيّص شوي اموالي
نصون عرضهم واجب علي نرعاه
عطوني الرد وريحو مشغالي
عارفيني لمناي كل امناه
من يومها ركح تريح بالي
ونا قبل خايف من كدر فرقاه
نحمد المولي ماخباث اعمالي
ومانيش طالق عيب مانرعاه
ناكلمتي للناس هي راسمالي
واللي يودني ياخذ اردود اكفاه
نفسي عزيزه والحلال اوكالي
ونخاف مولايا انريد ارضاه
لابعيب نبدا لانعادي والي
وحقي ان طال الوقت ماننسذاه
ومايوم نشكي للعبيد احوالي
مذله الشكوى كان مي لله
افعالي ايجن من قبل حتى اقوالي
راني ولد بيتن شهير نباه
لامالمروه يوم تما خالي
ولاهناك من فينا يخيب رجاه
يارب مايخيبن معاه امالي
ونحودّه عمري انا وياه