تنشد ليش

شعر اكرم الكاسح الدرسي

 تنشد ليش وحداني بطولي
قضيت العمر ف ايامه نعد
 عليك نرد لومانك عجولي
اقرب يالاي نشرح لك الرد
 نا ع الوقت ما قدرن حيولي
وياما درت غير مالي سعد
 وقتن شين زايد في ذبولي
وقتن فيه ماتامن لحد
 وقتن فيه حتى لمهبولي 
 قوله خير م العاقل قعد
 وقتاً فيه سراق الليولي
له مقدار واصحاب وسند
 وقتاً فيه متريح اوصولي
وبوعصران ماعنده جهد
 شاخ اليوم ع النجع الذلولي
وين ماحيل فرسانه انهد
 خبر بالعين شفته ماحكولي
نبطل كان فامراره نعد
 نا في العمل من يومة قبولي
لامانغيب غيبة من زهد
 ولاني كيف تنبال وملولي
وماله عذر فيت انه رقد
 نراجي فيه راتب يصرفولي
يكمل قبل ما يوصل اليد
 معيشة فقر هاضا حد قولي
وهم وغم واكدار ونكد
 نا والله كادني حمولي
من ياسات نبني وهي تهد
 حتى كيف عدو يخطبولي
بنت فلان وسمعته الرد
وقلت القسم مال معا ميولي
خان البخت في ساعة الجد.