شاكيتني

ردي علي قصيده للشاعر اكرم موسى الشلماني

شاكيتني ردت العين

ليام شينك وصايف

ياخوي حالك الشين

امجرب بروحي وشايف

نافلغلا داير جرانين

كملن امغير بحسايف

او واجد اللي تايهين

في صوب مالانصايف

نصيبك وقسمك اثنين

امن الله يجنك عطايف

لاينشرن مالدكاكين

ولاينهدن من رايف

لاتعيش يوم حزين

مخنوق عينك اتنايف

العمر راه فصلين

يجي خضر يتبعاصايف

ولازم ايجنك اسنين

فالعمر راهن عجايف

اصبر الصبر الزين

مايوم تم ابحسايف

وخليك عارف وين

ايكيدك غلا وترايف

راه الغلا تكوين

همومه ستايف ستايف

ولصواب ماهن مضامين

وفالقسم ياما كسايف

صيور نارك عوين

اتشيله ارياح الهفايف

مانكش جاهل الدين

ف الله تعبد وخايف

خلقنا الله من طين

ونعاودوله لفايف

ونفارقو الحيين

شايلينا عالكتايف

وبما جنت ليدين

ايجي حساب يوم الصفايف

نوصيك بالوالدين

واسمع كلام العرايف

ان كنهم عليك راضيين

واجدات تلقى عفايف

مافالبنات نوعين

ولاهن احزاب وطوايف

ولو قلت سمح او شين

ايغرك الشكل الزايف

ولوحرت بين اثنين

عقلك اتصيده خفايف

هذا راينا يازين

للجرح راهو وصايف

مافرق بين همين

الدخان كيف السفايف