بعيده

شعر اكرم الكاسح

راس البيت للشاعر عبدالله المجبري

((بعيده يم حزام يروج..طرقتك عوج..امفيت علي رهوان اقجوج)) 

غيرت في راس البيت شويه وقلت:

بعيده يم حزام يروج ..اطرقتك عوج..اْمفيت علي بي أم تفوج

بعيده يابنت البطنان
على اللي من بنغازي 
جاك امفيت بسياره بجنحان
توصلني فيسع يالاك 
ايهزنها اطناشن شيطان
وفي ساعات نطب حذاك 
اتلصف كي صلعة شوشان
حديث لوهانا لوهاناك
  نولع نطبقهن بيبان
علي عويلة جيلي فشاك
  معلي المسجل طربان
مرايف جاي انريد نلقاك
  ربطت السير انتاع لامان
طلعت معا نوضة الزوزاك 
امفيت يلطف ربيسبحان
انريد معا التسعه نلقاك 
الباسي ثوب الوان الوان
انظيف ووجيهي ضحاك
  وتنكي بنزينه مليان
ياريت تخلي معاي ادعاك 
مغطي عيوني بالريبان 
ونزورق في وقت ادعاك 
مشيط في ذيلها النيران
عجلها دايرات احتكاك 
مفوجها فوسط الميدان 
ويا تقاي امسك ماجاك  
محوسها في كل مكان 
مزنح وعقيلي شكاك 
وفيسع مانوصل ونبان
ولو عني مبعد ممشاك

مكينه من صنعة للمان..ولاماتموج ..قويه ياطيبك منتوج

بعيده يم الدور غزير
بقربك من مده نحلم 
جادونك مشوار خطير
طريق مكورف ومظلم 
امفيت على ام الصوت ورير
طريقك تلحس وتشلغم 
عالي بس موش اتطرطير
ومافيها دخان ايغم 
ابمرميتين لهن تصفير
ابيض من فم اللي صايم 
اتثوب ديما فيه الجير
وراها يبقى متعرم 
تمتع قدام وتوخير
وكيف الحجاله تبرم 
تفطفط كيف الطير اتطير
ان صار عناد وتسبقهم  
وما يوماً تبقى لاخير
معا ام الصوت اللي يرزم 
ثباته كان الجو مطير
ان زلقت لاتخاف اتلايم 
الكرسي فيها تقول سرير
معا لرباق اخبط تسلم 
طريقك لو فيها تكسير
ولو فيها حيط مكوم 
معاها ماتحس التنطير
تقول فوق جناح الحايم
  الا العداد معا التسكير
وراه هول وموت محتم
  وعزايا ايجوك طوابير
يعزو في صف منظم

ماهي كيف اركوب حمير ولامسروج ولاهي كي رهوان اقجوج.