العين والعقل ونا

 شعراكرم الكاسح

العين
بين الحياه والموت
لي صاحّه لي مريضه
فايت عليها الفوت
يادوب تقضي فريضه
صلى عليها الحوت
نفس غير ماله نهيضه
عكاس راي شينك بخوت
كي نقول سوده تقول بيضه

العقل

مروح بكل اكدار
افكاره طويله عريضه
وما يجيب غير لقهار
منقوع حنظل مخيضه
يقدع على اوهام دار
قاسي علي في لفيظه
نادم ومستوه محتار
من قل تمه قريضه

انا

نا بين عقلي وعيني
وبين زول صاعب لحيظه
وبين ناس ماتبيني
وبين جرح زايد نقيضه
بكّاي شكّاي اوكنيني
يشق ال لضلاع جضيضه
وماباش يكمل خزيني
من دمع بداد فيضه