ايام غياته

(شعر اكرم الكاسح)

نحكي لكم واعي وماني واعي
على ايام غياته وفي لطباع
اللي قبل لايسافر بكا لوداعي
زاد في كنيني لوعة الملتاع
واريت عبراتي كميت اوجاعي
نخاف نشغله مول العيون وساع
ونقول له هالدمع مالا داعي
وهاليوم لاماتحسباش وداع
نا خلقت لك وانته خلقت انتاعي
مغير قسمنا عاكس عصا ماطاع
سلم وعدى خطوته فاسماعي
شكاع سابق لاحقه طرقاع
ملرض ماحوتك رفعت كراعي
لدموع دارن تحتها منقاع
فيه مايفيدن لومتي واقناعي
ياسه اللي مشكل بكل انواع
دونك افزعلي متت يافزاعي
ناديت مالقيتش اللي فزاع
فكوه مني وكان تحت اضلاعي
حطو مكانه ياسم واوجاع
تمه غني وخابن معاه مساعي
افصوب انظلم مالقيت له دفاع
طلقته الخاطر شورهم مداعي
بلامال عندي في غلاه اطماع
زاد الغلا وزادن معاه اطماعي
وفرقاه كانت خاتمة لطماع